تخاريف
لما أمسك قلم و أكتب على ورقه من دفترى بابقى عاوز أكتب حاجات كتير
ملاحظات عاوزه تتدون
ذكريات محتاجه تتسجل
لحظات حزينه....... باتمنى انها تكون أحداث حلم فظيع و باتمنى اصحى الاقى حياتى العادية قبل الحلم ده رجعت تانى
لحظات فرح باتمنى انها تطول علشان أستمتع بكل همسه فيها
لكن ايه هى سعادتى و فين هو فرحى و امتى هأحس بيه ...؟؟؟
للسعاده.......... حتى الان انا مش عارف معنى .....
اكون ناجح ..؟؟ احتمال
أكون محبوب .. ؟؟ احتمال
اكون مشهور ....؟؟ احتمال
و بعد تفكير عميق اكاد اغرق فى ظلماته
اكتشف ان كل ماحققته لم يكن نجاحا ...........
اوقات كتير طلعت على مسرح و بقيت اعلى من المتفرجين يعنى بما انى واقف على مسرح .... و حبيت شخصية جميلة و قررت امثلها بما انى ممثل مشهور و بعد اداء جميل و تقمص رائع للشخصية و بعد تصفيق حاد من المشاهدين
أروح بقى مع فريق العمل .........اللى كان موجود علشان بس ابقى انا نجم ...
ياما رجعت بالليل للمسرح اللى كنت بامثل عليه و ابص له و اتأمل و اقول فى سرى ....انا موجود و الموهبه موجوده و حافظ دورى ...... و ممكن أجيب فريق التمثيل اللى كان شغال معايا و نعمل المسرحيه تانى
بس ناقص حاجه واحده .............. نجاحى .......
اكتشفت ان نجاحى كان مجرد ساعات معدوده هى فتره مسابقة التمثيل كنت دايما بابقى النجم وواثق فى قدرتى الخارقه على التمثيل
و بعد كده تنتهى المسابقه و الطلبه اللى كانت موجوده علشان تنافسنى بعد ما حيونى رجعو لمدارسهم و اخدت انا مكافأتى و هى كانت شهاده قيمتها لا تتعدى العشرة جنيهات و الشخص الموقع ادناها عدد اللذين يعرفوه اقل فى العدد من عدد الجنيهات
أرجع تانى أكمل حياتى و اكمل دراستى و بالمره أكمل احلامى التى لا تنتهى و لا تموت بالرغم من ان معظمها أصبح مستحيلا لانه مرتبط باشخاص و احداث هم الان فى تعداد الماضى
يعنى نجاح مؤقت و كان مصيره الحتمى هو الموت .......
شعور صعب و مؤلم لما تلاقى حد مؤمن بجد بقدراتك و موهبتك و بنظرات عينيه بينقل لك الاحساس بالثقه و الشعور بالذات و ادراك قيمتك الفنيه التى أصبحت انت عليها
هو قبلك اتمنى لو يكون مخرج سينيمائى علشان يقدم لك خدمة العمر و تكون انت ممثل مشهور و معروف
اممممممم
يعنى اكون مشهور ...خرجت من قائمة الاحتمالات و دخلت قائمة الاحلام .... و بكده تعلن وفاة نجاحك القصير العمر
بس
مش بعيد ان فيه بنت جميلة حضرت العرض الخاص بمسرحيتى و ممكن تكون اعجبت بيا ..او وقعت فى حبى
و من الطبيعى بما انى نجم و خالى القلب بالتاكيد انا ابادلها نفسى الشعور .... حد يكره ان يكون له صديقه على حد قولك انت ......... و حبيبه على حد قولها هى
ما هى بتحس ان كلمة صديقه مش ملائمه ليها
طبيعى ماهى شافت افلام كتير رومانسيه و من الطبيعى انها تقوم ببطولة واحد من الافلام دى و علشان هى كريمة اعطتك دور البطل
و بيجى الوقت اللى هى بتبقى فيه منى قريبه و ساعات باوهم نفسى و اقول عادى ما هو انا نجم
بداية كلامى معاها بتكون عامله ايه ...؟
و نهاية كلامى معاها بتكون هتعملى ايه بكره ...؟؟
يعنى انا ما بقتش البطل خلاص ......
وقتها احس انى مش بس حلمى اللى بيموت
يبدو ان انا اللى بألفظ أنفاسى الاخيره فى الحياه الجميله
حياة النجاح ......... و حياة الحب
و بالتالى
أكون محبوب ...... خرجت من قائمة الاحتمالات و دخلت قائمة الاحلام المحكوم عليها بالاعدام
أممممممممممممممممممم
و بكده الحلم التانى راح
بس ممكن بعد اما حد يقرا الخاطرة دى يقول العقرب .........
و هيكتب اى صفه ممكن تكون حلوه أو لا
و ممكن يكرر الكلمه دى فى اى موضوع تانى و اتشهر بقى
و يا سبحان الله
كده الحلم التالت أتحقق
انى اكون مشهور
بس هل
الشهره = النجاح ؟؟؟
بالنسبه لى انا
الشهره ...... ادمان
و المال ...... ضروره
و الحب ..... مطلوب
و النجاح .... مؤكد
شكرا لكم
من مذكرات
العقرب العجوز المبرمج
اليكم خاطرتى