الحب يعمل المعجزات !

الحب يعمل المعجزات

جمله كنا بنقولها كتير لما مش بنلاقى
غير كلمة الشجاعه توصف فعل احد الشبان تجاه حبيبته
زمان كان الشاب المتيم بواحده يجازف مجازفات
ويروح لها تحت شباكها وينادى ويغنى ويرمى
لها ورد وهو غير مهتم بابوها اللى ممكن
ينزل يشرحه ولا اخوها اللى يقطعه ولا بالميه المعتبره
اللى هتترش عليه..كان بيجازف ولا يهمه اى حد
هل كان بسبب الحب؟؟
اكيد..اه
انما دلوقتى يقولك ايه: ليه يا عمنا ده انا اقعد عنتر زمانى
والبنت من دول تيجى لحد عندى وده
بيحصل حتى لو كان بيحبها برضه هيقول كده
زمان كانت البنت تقف فى وش اهلها كلهم نفر..نفر
عشان خاطر حبيبها وميهمهاش حد
هل كان بسبب الحب ؟؟
اكيد..اه
انما دلوقتى تقولك ايه: واحد يروح عشرة ييجوا
وتنمر لك على العريس من دول وما تخيبش ابدا

ليه مبقاش الحب زى الاول؟؟
ليه مبقناش الايام دى نقول الحب بيعمل المعجزات ؟؟
ليه دلوقتى لو سألنا الشباب يكون ده رد معظمهم: “بلاحب..بلا بتاع..مبقاش فيه حاجه اسمها
حب عشان يبقى فيه معجزات”
يمكن ده يتوقف على اختلاف مفهوم الرومانسيه من زمان لدلوقتى
..الاول كان الورد الاحمر
والموسيقى الهاديه الناعمه.
.انما دلوقتى زمن التيك اواى والمسجات والحب السريع
بس رأيى انا انه لسه فيه حب ولسه فيه معجزات
يمكن مش زى بتوع زمان بس معجزات برضه
ولسه فيه برضه شباب وبنات بتعمل المعجزات عشان يتمسك بحبيبته
..او تتمسك بحبيبها
لان..…
لسه الاحساس موجود..والقلب بينبض

منقول
اتمنى يحوذ الاعجاب

فعلا لسة الاحساس موجود والقلب بينبض

بس للاسف الناس هى الى اتغيرت
ماحدش بقى يحب حب حقيقى
كلة بقى تيك اواى زى ما بتقول

موضوعك رائع ياعقرب

اولا احييك علي الموضوع الجامد ده

اكيد فيه الحب اللي بيصنع العجزات وموجود كتير جدا بس احنا مش بناخد غير الجانب السلبي في حياتنا بمعني ان لو واحد او اتنين او حتي عشره قالوا الكلمتين دول يبقي كل الشباب بتقول كده
اكيد الحب موجود بكل اشكاله وانواعه ومن غيره مش نقدر نعيش وكل شيء بنعمله في حياتنا بدافع الحب من اول ما تصحي من النوم وتقول لوالدتك صباح الخير لحد ما تيجي تنام وهكذا هي الحياه كلنا بنحب بنقدم تضحيات وبتقدم عشانا تضحيات اكتر ده برضو بدافع الحب

اقتباس :: انما دلوقتى يقولك ايه: ليه يا عمنا ده انا اقعد عنتر زمانى
والبنت من دول تيجى لحد عندى وده
بيحصل حتى لو كان بيحبها برضه هيقول كده
زمان كانت البنت تقف فى وش اهلها كلهم نفر..نفر
عشان خاطر حبيبها وميهمهاش حد

مش اعتقد ان بنت ممكن تحط نفسها في موقف زي ده

واللي تقف قصاد اهلها عشان واحد دي مش عارفه اقول عليها ايه لانها كده بتعصي اهلها هي اكيد من حقها انها تختار بس يبقي بالاقناع والتفاهم

اقتباس :: انما دلوقتى تقولك ايه: واحد يروح عشرة ييجوا
وتنمر لك على العريس من دول وما تخيبش ابدا

مش كل البنات كده ياعقرب الكل بيظلمهم ليه مش عارفه وعلي فكره مش كل شئ العريس التمام
بالنسبه لي راحه بالي افضل من اي شئ مش العريس اللي ما يتخيبش

اقتباس :: .انما دلوقتى زمن التيك اواى والمسجات والحب السريع

كل زمن وله الوسائل بتاعته

علي العموم شكرا ليك

موضوع رائع رائع يا عقرب
والحب لسة موجود بس الناس هى الى مش موجودة فية مشاغل تانية

كلام جميل جدا
كلامك معقول اوى يا ضوء
و شكرا ليكى يا نور انتى و دعاء على المرور بالموضوع !

زائر

لسه الاحساس موجود..والقلب بينبض

مازال القلب ينبض بالحب
موضوعك رائع يا عقرب كالعاده طبعا

بس انا بختلف مع ضوء في وجهة نظرها
مع البنت اللي تقف قصاد اهلها عشان خاطر
الانسان اللي بتحبه
هي مش بتعصاهم يا ضوء هي بتحاول تختار شريك حياتها
ومدام الانسان ده كويس اكيد هتقنع اهلها بيه وقلبها جامد
لانه الاهل مش بيكونوا عايزين غير راحة بنتهم وسعادتها

لانها عمرها ما هتخسر اهلها عشان واحد مش يستاهل

ولا ايه؟؟؟؟؟؟؟؟؟؟؟؟؟؟؟؟؟؟

رايك جميل يا نبض
بس تقريبا غريب او خارج عن المالوف !

تقريبا يا نبض الراي واحد وهي انها تقنع اهلها بالشخص اللي هي اختارته واكيد من حقها انها تدافع عن اختيارها بس ده مش معناه اني اقف اقدام اهلي انا ممكن اقنعهم بالشخص ده واشوف هما شايفين ايه مش شيفاه او اخليهم يشوفوا الموضوع من وجهه نظري

وبعدين الاهل عندهم خبره اكتر من الابناء في الحياه وعارفين اكتر وعمرهم ما يتمنوا ليهم الا السعاده في حياتهم
وبعدين فيه حاجه لا خاب من استشار ودول اهل مش اصحاب

زائر

صح كده احنا كده متفقين
يا ضوء

بس ليه يا عقرب بتقول انه غريب او خارج عن المألوف

الرأي واحد
المهم انها تدي فرصه لاهلها
يقولوا رأيهم فيه ويعرفوا عنه كل حاجه
ولو وحش او مش كويس
ويقنعوها وما تصلبش رايها
ولو كويس واقتنعوا بيه وبوجهة نظرها
يبقي مفيش مشكله
وتكون مقتنعه ان اهلها دايما هيدوروا ع راحتها وسعادتها